ఇదో వయసు ముచ్చట

 నా వయసులోని నా మిత్రులంతా

ఏవయసుకాముచ్చటపడిన ప్రేమ పక్షులైతే
నేనేమో ఉన్నత చదువులూ ఉద్యోగాలంటూ
కలంనిండా సిరాతో కళ్ళజోడునయ్యాను
నా వయసులోని నా మిత్రులంతా
వాళ్ళ పిల్లల్ని ఉన్నత చదువుల కోసం
దేశదేశాల్నీ జల్లెడ పడుతుంటే
నేనేమో ఒక్క పితృ స్పర్శ కోసం
దేశదేశాల్లోని వైద్య రహస్యాల్ని అన్వేషిస్తున్నాను
నా వయసులోని నా మిత్రులంతా
వాళ్ళ పిల్లలకు పెళ్ళిళ్ళు చేస్తుంటే
నేనేమో మా వాడికి
జోల పాటల్ని పాడుతున్నాను
నా వయసులోని నా మిత్రులంతా
వాళ్ళ పిల్లల పిల్లల్ని ఎత్తుకుంటుంటే
నేనేమో మా వాడి తొలి అడుగుల
దృశ్యగీతికల్ని ఏరుకుంటున్నాను
నా వయసులోని నా మిత్రులంతా
తరాల వంతెనపై నిర్భయంగా నడిచిపోతుంటే
నేనేమో మావాడి కళ్ళల్లో మెరిసేవన్నీ
ఆనందాలో  విషాదాలో తెలియని
ఆ కన్నీటి పొరల్ని విడదీసే ప్రయత్నం చేస్తున్నాను
- ఆచార్య దార్ల వెంకటేశ్వరరావు, 28.3.2022