కవుల ధన్య చరిత శతకం

తెలుగు కవుల ధన్య చరిత శతకం 

శ్రీకరముగను సత్కవి శేఖరులకు

నమిత భక్తిని మ్రొక్కెద నాత్మ లోన

ధరణి వెలుగును పంచెడి ధన్యమూర్తు

దార్ల పలికెడు -సుకవుల ధన్య చరిత!  (1)

శ్రీలు కురియగ కోరిన చెట్టు వోలె

అడిగినంతనె యీయును అర్థములను

కావ్య సుమముల నల్లెడి కల్ప తరువు

దార్ల పలికెడు -సుకవుల ధన్య చరిత! (2)

శ్రీకరముగను వెలుగును జేయునట్లు

మింటి సూర్యుడు చంద్రుడు మేదినినిల

చీకటిని బాపు కవులన్న చిత్రమూర్తు

దార్ల పలికెడు -సుకవుల ధన్య చరిత! (3)

శ్రీల నొసగుచు గంధము చెంత జేర

పరిమళము నిచ్చు నెల్లెడ ప్రమదమొసగ

కవన మధురిమ పంచెడి ఘనత వలతు

దార్ల పలికెడు -సుకవుల ధన్య చరిత! (4)

శ్రీలు కురియగ కోరిన చెట్టు రీతి

నడిగినంతనె యీయును నర్థములను

కావ్య సుమముల నల్లెడి కల్ప తరువు

దార్ల పలికెడు -సుకవుల ధన్య చరిత!(5)

నన్నయ భట్టు:

సంస్కృతము నుండి విడివడి చక్కగాను

ఆంధ్ర భాషకు సూత్రము లల్లి నాడు

వాక్కు నకనుశాసను డయ్యె వసుధ పైన

దార్ల పలికెడు -సుకవుల ధన్య చరిత! (6)

ఆది కవి మొదలందరి నార్యులెంచి

కబ్బముల నల్లెరిల పైన కమ్మనగను

జాతి గౌరవమును నిల్పు చతురమతులు

దార్ల పలికెడు -సుకవుల ధన్య చరిత! (7)

తేనె లొలికెడి పండ్లను తిన్న యట్లు

సులభ శైలిని పద్యము లల్లి నాడు

తెలుగు జాతికి నిలవగు వెలుగు తోడ

దార్ల పలికెడు -సుకవుల ధన్య చరిత! (8)

ఆది సభ పర్వముల నిల వ్రాసి నాడు

పర్వమారణ్యమధ్యలో నాగి పోయె

నైన నన్నయ కీర్తియు నంత మెరుగు

దార్ల పలికెడు -సుకవుల ధన్య చరిత! (9)

ఆది కవియని కీర్తిని నందె నతడు

తెలుగు సాహిత్య పీఠము నిలిపె నతడు

నిలిపె నతడుతెలుగులకు నిత్యకీర్తి

దార్ల పలికెడు -సుకవుల ధన్య చరిత! (10)

కవన మున మువ్వు రందున ఘనుడు వాడు

భారతము నందె యున్నవి పరమ సత్య

ధర్మ మార్గము లెల్లను ధరణి వెలుగ

దార్ల పలికెడు -సుకవుల ధన్య చరిత! (11)

అక్షరములకు రమ్యత నమర జేసి

కథల కతడు ప్రసన్నత కన్నె జేసె

మాధురిని జిల్కె మాటల మహిమ తోడ

దార్ల పలికెడు -సుకవుల ధన్య చరిత! (12)

భాసు రముగను నిలిచెను భట్టు తోడు

సాయ మొసగెను కవికిల శక్తి తోడ

అర్జు నునకిల కృష్ణుడు నండ యట్లు

దార్ల పలికెడు -సుకవుల ధన్య చరిత! (13)

తేనెలొలికించు మాటల తీరులందు

భావ గరిమను పంచెడి భక్తవరులు

తెలుగు వెలుగును నిలిపిన దివ్యమూర్తు

దార్ల పలికెడు -సుకవుల ధన్య చరిత! (14)

ప్రాస యతులను కూర్చిరి పద్ధతిగను

చక్కనైనట్టి ఛందస్సు శక్తి తోడ

లోక రీతులు తెలిపిన లోక హితులు

దార్ల పలికెడు -సుకవుల ధన్య చరిత! (15)

అక్షరములందు ప్రాణము నద్దినారు

సత్య ధర్మములెప్పుడు చాటినారు

నిత్య నూతన శోభల నిచ్చు వారు

దార్ల పలికెడు -సుకవుల ధన్య చరిత! (16)

తిక్కనామాత్యుడు:

శ్రీల నొసగును తిక్కన శైలి యెపుడు

కళ్ళ ముందర పాత్రలు కదలు నట్లు

నాట కమ్మును చూచిన నడక తోడ

దార్ల పలికెడు -సుకవుల ధన్య చరిత! (17)

శ్రీకరముగను మువ్వురు సిద్ధ మవగ

వేద తుల్యము భారత మెలమి తోడ

గంగ యమున సరస్వతి గలిసినట్లు

దార్ల పలికెడు -సుకవుల ధన్య చరిత! (18)

శ్రీకరముగను నన్నయ జేసినట్టి

అరయగ నరణ్యమాగియు నట్టె యుండ

పూర్తి చేసెను నెర్రన పొందు గాను

దార్ల పలికెడు -సుకవుల ధన్య చరిత! (19)

శ్రీకరంబుగ తిక్కన చేసె నాడు

పదును నైదును పర్వముల్ భవ్యముగను

హరియు హరుడను భేదము మాన్పి నాడు

దార్ల పలికెడు -సుకవుల ధన్య చరిత! (20)

ఎఱ్ణనామాత్యుడు:

శ్రీలు వెలసెను నెర్రన చిత్ర మందు

పరమ శివుని కృపన్ పేరు పడసె నతడు

వర్ణ నలయందు నతుడును వాసి కెక్కె

దార్ల పలికెడు -సుకవుల ధన్య చరిత! (21)