బాబా అంబేద్కర్! నువ్వే నా మార్గదర్శివి

నువ్వు
నా చీకటిని పారద్రోలిన సూర్యుడవు
నువ్వు
నా బానిసత్వాన్ని ఓడించిన యోధుడవు
నువ్వు
నా అవమానపు సంకెళ్లు తొలగించిన రాజ్యాంగానివి
నువ్వు
నా మూతికివేలాడే ముంతను తొలగించిన
నిలువెత్తు ఆత్మగౌరవానివి!
నువ్వే లేకుంటే 
నన్నింకా మనుస్మృతి మంటల్లో కాల్చుకుతినేవారేమో
నువ్వే లేకుంటే
ఆ మతమౌడ్యం గోతిలోనే పరుగెత్తమనేవాళ్ళేమో
నువ్వే లేకుంటే
ఆదిమానవుడిలా  నన్నలాగే
సంచరించమనేవాళ్ళేమో
అందుకే నువ్వే నేనై
నేనే నువ్వై ముందుకెళుతూ ...
-ఆచార్య దార్ల వెంకటేశ్వరరావు, 14.04.2020