ఈ వెలుతుర్ని మింగేస్తున్నదెవరు?

ఇప్పుడిప్పుడే 
జీవితం అంకురమవుతున్న  
ఈ నేలను తవ్వేస్తున్నదెవరు?
ఆ సముద్రాల్ని ఈ కళ్ళనిండా
గడ్డ కట్టించి మరీ ప్రవహిస్తున్నదెవరు?

ఆ చీకట్నంతా ఈ మనసు ముంగిట్లో

అలా గుట్టలు గుట్టలుగా పోస్తున్నదెవరు?

ఈ మనోమైదానంలోని ఆ పులకాంకురాల్ని

బలవంతంగా ఎత్తుకుపోతున్నదెవరు?

ఆ వేణువునలా గాయం చేసి

ఇలా కీచురాళ్ళను విసురుతున్నదెవరు?

ఈ పూలతోటలన్నీ కూకటి వేళ్ళతో పెకలించేస్తూ

అలా నాగజెముళ్ళను పాతేస్తున్నదెవరు?

ఈ నవ్యోత్సవ సుప్రభాతంపై

ఇలా ఉక్కుదుప్పట్లను కప్పేస్తున్నదెవరు?
-వి.ఆర్. దార్ల
7-9-2017

(సాక్షి సాహిత్యం పుట 20 నవంబరు 2017 )