నవరత్నాల నానీలు

- దార్ల వెంకటేశ్వరరావు

యూనివర్శిటీ కాంపస్‌కి
రాత్రీ పగలూ లేదు
నిన్నినే అడ్మిషన్లు పూర్తయ్యాయి !

ఇంటర్నెట్‌లో కులుకుతున్న
నిద్రను లాక్కొని రావడానికే
ఇంత అర్ధరాత్రైనా ప్రయాణమైంది !

ఇంకా తెలవారడం లేదు
బిగికౌగిట సూర్యుణ్ణి
కమలిని విడిచిపెట్టలేదేమో !

గుండెపగులుతూనే ఉంది
బద్దకం పిల్ల మాత్రం
కవిత్వాన్ని వండనివ్వడం లేదు !

ఇస్త్రీమడత
ఆఫీసుకొచ్చేసరికే చెమటకంపు
సిటీ బస్సు ప్రేమతో ఆలింగనం !

కపటప్రేమ ఎరకి
ఇంకో చేప పిల్ల
గేలానికి తగిలాకే మూలుగు !

శీతాకాలంలో దుప్పటి
అమ్మ ఒడిలో వెచ్చదనం
మళ్ళీ బాల్యం గుర్తొచ్చింది !

నాకీ భాష చాలదంటూ
మౌనవీణ మీటిన మనసు
మూగ భావాల లోగిళ్ళలో కళ్ళు !

పండుకొబ్బరాకు చూసి
పైనున్న పచ్చి కొబ్బరాకుకి నవ్వు
జీవితాన్నిప్పుడే ప్రారంభిస్తున్నట్లుంది !
( ఇవి 2002 కంటే ముందు యూనివ్ర్సిటీలో చదివేటప్పుడు రాసిన మినీకవితలు. వీటిని వెబ్ ప్రపంచం వాళ్ళు అప్పుడే ప్రచురించారు. వారీ సౌజన్యంతో మళ్ళీ ఇక్కడ పున:ప్రచురిస్తున్నాను. )