కన్నీటికి విలువ కట్టగలమా!
కన్నీటికి
రంగు లేదు, రుచి లేదు, శబ్దం లేదు
అయినా అది
పలకలేనంత ఓ జీవిత చరిత్ర!
కళ్ల నుంచి జారిన కన్నీరు
నేలలో కలిసిపోతుంది;
మనసులో దాచుకున్న కన్నీరు
మనిషిలోనే మిగిలిపోతుంది!
కొన్ని కన్నీళ్లు
కళ్లను దాటి రావు
గుండె గోడలపై గాట్లుగా మిగిలిపోతాయి!
కొన్ని కన్నీళ్లు
చెంపల మీదకు రాకముందే
పెదవుల దగ్గర
నవ్వులై రాలిపోతాయి!
కొన్ని కన్నీళ్లు
దిండు మీద పడవు
నిద్రలేని రాత్రులుగా
కళ్లలోనే మెలకువగా ఉండిపోతాయి!
కొన్ని కన్నీళ్లు
ఎవరినీ తడపవు
ఒంటరి గదిలో
మనిషిని లోపల్లపలే తడిపేస్తుంటాయి!
కొన్ని కన్నీళ్లు
జ్ఞాపకాలను తుడిచెయ్యలేవు
మరింత స్పష్టంగా
మనసు గోడలపై బాధల గాథల్ని చెక్కుతాయి!
ఏడ్చినవాడికి కన్నీరు తేలిక చేస్తుందేమో ఏడవలేనివాడికి మౌనమే భారమవుతుంది!
చివరికి కన్నీరు ఎండిపోతుంది,
కళ్లు కూడా ఎండిపోతాయి
కన్నీరు పుట్టించిన కారణం మాత్రం
మనిషిలో ఎప్పటికీ ఎండిపోదు!
-దార్ల వెంకటేశ్వరరావు 3.9.2026
కామెంట్లు లేవు:
కామెంట్ను పోస్ట్ చేయండి