ఆమె ఎప్పుడూ ఓ ప్రశ్నల కెరటమే!
ప్రతి క్షణం
ఆమె నోటిలో
ఒకే రకమైన ప్రశ్నలు
“ఏం చేస్తున్నారు?”
“ఎక్కడున్నారు?”
“నీ పక్కన ఎవరు ఉన్నారు?”
ఫోన్ మౌనంగా ఉంటే
ఆ ప్రశ్నలు
మనసులో మరింత గట్టిగా మ్రోగుతుంటాయి,
సమాధానం ఆలస్యమయ్యేకొద్దీ
అనుమానం చిన్న మంటలా మొదలై
పెద్ద అగ్నిలా మారుతుంది.
ఆమె ఎక్కడడున్నా
ఆ మనసు మాత్రం
నా మది తలుపును తడుతూనే ఉంటుంది.
ఆమె మాటలు
చిరు జల్లుల్లా మొదలైనా
రాళ్ళవర్షంతోనే ముగుస్తాయి
ఆమె ఓ నిలువెత్తు అనుమానపు సంతకం!
ఆమె మనసు
ఎప్పుడూ ఒకే ప్రశ్న
పలు విధాలుగా అడుగుతుంది:
“ఏం చేస్తున్నారు?”
“ఎక్కడున్నారు?”
“నీ పక్కన ఎవరు ఉన్నారు?”
నాకు మాత్రం
ఆ ప్రశ్నలు
సమాధానం కోరిన మాటల్లా అనిపించవు.
నన్ను మర్చిపోలేదుగా అని
ప్రేమతో అడిగే
మరో భాషలానే అనిపిస్తాయి!
దార్ల వెంకటేశ్వరరావు 16.7.2026
కామెంట్లు లేవు:
కామెంట్ను పోస్ట్ చేయండి