సూర్యదేవుని వర్ణన (తేటగీతి పద్యాలు)

 సూర్యదేవుని వర్ణన (తేటగీతి పద్యాలు)

తేజమును వెదజల్లుచు దిశల యందు

ఎర్ర నైనట్టి రాతిపై నమరి యున్న

సప్త అశ్వాల రథమెక్కి సాగు చుండ్ర

గగన వీధిని సూర్యుడు గరిమ తోడ!

ఉషయు ప్రత్యూష లనెడి ఆ ఉవిద లిరుగ

ప్రక్క నుండగ వెలుగుల ప్రబల గనుచు

పద్మములను జేతులలోన భక్తి తోడ

ధరణి కంతట శక్తిని దయను నొసగు!

తొడలు లేనట్టి -సారథి -తోడు నిలువ

చక్ర మొకటియె గల్గిన శకట మందు

ఏడు ఛందస్సు లశ్వాల రీతి నడచు

కాల చక్రము తిరుగును ఘనము గాగ!

ఆత్మ రాముడు - లోకాన - నలరు చుండ

చక్షు వనగను - వెలుగుల - జారు నట్లు

జ్ఞాన మార్గము - జూపెడి - ఘనుడు తానె

భాస్కరు డనగ - ప్రబలను - భాతి తోడ!

కళల నిలయమై -కోణార్క -కాంతి మీర

నిలిచె శిల్పము -గరిమను -నిఖిల మందు

ధర్మ మార్గము -నిలుపగ -ధరను నెపుడు

భాను నెప్పుడు -హృదినిని -భక్తి తోడ!

రవియె దాతయై -యవనిని -రక్షణముగ

శక్తి నిచ్చుచు -నెప్పుడు -సాగు చుండు

వేద మంత్రాల -వెలుగుల -వికసితముగ

జపము జేయగ -గాయత్రి -జయము నిచ్చు!

రవియె జ్యోతియై -రాజిల్లు -రాశి యనగ

వెలుగు నిచ్చుచు -విజ్ఞాన -వితరణముగ

తమము బాపెడి -దైవమై -ధరను నిలుచు

నిత్య సాక్షిగ -నిఖిలము -నెరుగు నతడు!

కనుల కాంతియై - కాపాడు - ఘనుడు తానె

ప్రకృతి శక్తుల - ప్రాణమై - పరగు వాడు

కర్మ సాక్షిగ - కాలమున్ - కలుగు జేయు

భాను డొక్కడే - పరమాత్మ - భాతి తోడ!

రవియె జ్యోతియై -రాజిల్లు -రాశి యనగ

వారముల నేడు -వర్ణాల -వైఖరినియు

సప్త ఛందస్సు -లశ్వాల -సరణి నడువ

కాల చక్రము -తిరుగును -గరిమ తోడ!

ఉషయును మఱియు -ప్రత్యూష -లుభయ సంధ్య

లమరి యుండగ -వెలుగుల -నమితముగను

శక్తి జ్ఞానము -లొసగెడి -స్వామి యతడు

భాస్కరుడు జూపు -లోకాన -బ్రతుకు దెరువు!

జ్ఞాన దీపమై -వెలుగును -గాంచ నగును

పరిమళించెడి -పద్మముల్ -పాణి నుండ

నిత్య సాక్షిగ -నిఖిలము -నెరుగు చుండ

భాను డొక్కడే -పరమాత్మ -భాతి తోడ!

పరుల కోసమే - తపియించు - పరమ మూర్తి

 ఫలము కోరక - ప్రభలను - పంచు వాడు

త్యాగ గుణమును - నేర్పెడి - తత్త్వ మిదియె

భాస్కరుని సేవ - పరమార్థ - పథము జూపు!

ఆచార్య దార్ల వెంకటేశ్వరరావు 

26.4.2026