వర్షించెనొక మౌనసంగీతం!
మౌనానికున్న ఆ భాష నీకు తెలియాలంటే
ప్రవహించే ఆ నదిని చూడు
మౌనానికున్న ఆ భావం నీకు అర్థం కావాలంటే
కరిగి కరిగి హిమశిఖరమే
నదిగా మారిన ఆ ప్రవాహాన్ని చూడు
పరుగుపరుగున వచ్చిన ఆ నదిని
తనలో కలుపుకున్నంతనే
చిన్నపిల్లాడి చేతిలో తియ్యని పదార్థమేదో ఆవిరైపోయాక
మళ్ళీశిఖరంలా మారిన ఆ హిమాలయాన్ని చూడు
నదిలో శిఖరమున్నది
శిఖరంలోనే నది కూడా ఉంది
ఈ రెండూ ఒకర్నొకరు వీడకుండానే
విడివిడిగా
ఒకరికొకరు కరిగించుకుంటూ
ఒకరికొకరు మరిగించుకొంటూ
తమలో తామే స్పటికంలా మెరుస్తుంటాయి
నదీ - హిమశిఖరమూ మాత్రమే చూసుకోగల
అద్వైత సౌందర్యచిత్రమది
నదికీ - హిమశిఖరానికీ మాత్రమే
ఏకాంతంగా వినగలిగే మౌన సంగీతమది!
-దార్ల వెంకటేశ్వరరావు,
కామెంట్లు లేవు:
కామెంట్ను పోస్ట్ చేయండి