ఈ రోజెందుకో కొత్తగా ఉంది

 ఈ రోజెందుకో కొత్తగా ఉంది 

 ఈ సూర్యోదయం ఎందుకో కొత్తగా ఉంది

నవ్వుతూ కౌగిలించుకుంటున్న

ఈ ప్రభాత సమయాన్ని చూడు

నీ చుట్టూ  ఎదురుచూస్తున్న

అందమైన పూబాలల అమాయకత్వం

ఇంతకుముందు ఏమీ జరగనట్లే 

మళ్లీ ఆ పసిపిల్లల్లా స్వచ్ఛమైన నవ్వులు రువ్వుతూ

మన ఒడిలోకొచ్చి వాలిపోతున్నట్లున్నాయి

ఎందుకో ఈ ప్రభాతమెంతో కొత్తగా ఉంది

ఎప్పటిలాగే ఈనాడు కూడా తెల్లవారినా

ఈ రోజెందుకో నిర్మలంగా మారి కొత్తగా మత్తుగాఉంది

మబ్బులు తొలిగిపోయిన

రహదారేదో వెలుగురేఖలతో స్వాగతం పలుకుతున్నట్లుంది

దారికి  రెండువైపులా

సుకుమారమైన చేతులేవో

నీ రక్షణ కవచాలమంటూ

హృదయానికి హత్తుకుంటున్నట్లున్నాయి

ఎవరో ఒక మహరాణి  

నిర్భయంగా, హుందాగా అడుగులేస్తుంటే

ఈహృదయం నిండా

కోటిభావాలేవో ఉప్పొంగుతున్నట్లున్నాయి

ఈ రోజెందుకో కొత్తగా ఉంది

అశాంతి చీకట్లను జయించాక

కోరివచ్చిన మనసేదో ప్రేమపరిమళాల్ని 

నిలువెత్తు దండనే వేసినట్లుంది!

• ఆచార్య దార్ల వెంకటేశ్వరరావు

6.7.2023