మౌనఘనీ‘భవనం’ ( ఈవారం కవిత)

మనం దినపత్రిక వారి ఆదివారం అనుబంధం ‘మకుటం’ 24 జూన్ 2018

మౌనఘనీ'భవనం'!

ఏమిటిది?

పూలతోటలో శత్రుకీటకాల సామూహిక దాడి 

ఈ మొక్కల్నలా బుల్డోజర్లతో తొలిచేస్తున్నదెవరు?

జీవితాన్ని చిగురించుకొనే పిడికెడు నేలే కరువయ్యిందే!

గుండెనిలా మెత్తగా కోసేస్తున్నదెవరు?

నా నుండి నన్నే దూరంగా విసిరేస్తున్నదెవరు!!

దేన్నైనా కరిగించగలిగే సముద్రంలో

ఎందుకలా పర్వతాలు మొలుసుకొస్తున్నాయో!

ఆ పర్వతాలింగనాల్లో తడిసిన

ఎందుకలా రాగరంజిత ముద్రలు రోదిస్తున్నాయో!

నదీనదాల్లారా... 

మీ స్నేహామతాన్నలా మింగేస్తున్నదెవరు?

ఏమిటీ నిశ్శబ్దం? ఏ ఆకూ మెదలదేమి!

ఏమిటీ మౌన ఘనీ'భవనం'? ఏశబ్దమూ ధ్వనించదేమి!

ఆ సూర్య చంద్రులలా స్థంభించిపోయారేమి?

ఊపిరాడని ఆ ఏకాకితనమేమి?

ఏమిటీ అకస్మాత్తుపు నిద్ర?

ఎక్కడకీ అమాంతపు విస్మరణ యాత్ర?

ఏమిటీ విడువడని నిశాసర్పగాఢపరిష్వంగం?

                                                         - దార్లవెంకటేశ్వరరావు

                                                         9182685231