వానకురిసిన రాత్రి!
కాసేపు కవిత్వం ఒడిలో
సేదతీరాలనుంది
హృదయ వీణ పలికించే మౌనసంగీతంలో
తడిసి తడిసి ముత్యమవ్వాలనుంది
నువ్వలా దృశ్యం దృశ్యంగా కళ్ళముందు
కదిలాడుతుంటే
గట్లుతెగిప కళ్ళనలా
స్వచ్ఛంగా ప్రవహించనివ్వాలనుంది
ఈ వానకురిసిన రాత్రి
నేనూ ఓ వానచినుకునవ్వాలనుంది
కొండల మధ్య నుండి వచ్చేవని భ్రమించిన
ఆ సూర్యోదయాల్ని కాదు,
గుండెల్నుండి చీల్చుకొచ్చినా
నిజమైన శుభోదయాల్నే స్వాగతించాలనుంది
జీవితం ఊహల పల్లకీ కాదు
జీవితం ముళ్ళబాటలూ కాదు
జీవితం అరిషడ్వర్గాల్నీ పరుచుకున్న రహదారి!
జీవితం అన్నీ నీవై
అన్నీ నేనై కనిపించీ కనిపించని
సత్యం, శివం, సుందరం పరిచిన సౌందర్యం!
- దార్ల వెంకటేశ్వరరావు, 9182685231
( సూర్య దినపత్రిక, అక్షరం పేజీ, 8.8.2022 సౌజన్యంతో)
No comments:
Post a Comment