ఈ తప్పెలా చేశారు?

తెలుగు సాహిత్యం- మాదిగ జీవిత ప్రతిఫలనం పేరు నేను రాసిన పరిశోధన వ్యాసాన్ని నా పేరు తొలగించి, ఆ వ్యాసాన్ని ఈ మధ్య ఒక బ్లాగులో యథాతధంగా ప్రచురించుకున్నారు. ఎంత దారుణమో చూడండి. ఈ వ్యాసం దగ్గరే నా పేరు వివరాలు కూడా రాశాను. ఈ వ్యాసం ప్రజాకళ అంతర్జాల పత్రికలో  http://prajakala.org/mag/2008/06/darla_june08_essay వచ్చింది. తర్వాత తెలుగు అకాడమీ, పొట్టి శ్రీరాములు తెలుగు విశ్వవిద్యాలయం వారి వాఙ్మయి లో కూడా వచ్చింది. అయినా సరే https://welcometonagsblog.blogspot.com/ లో నా వ్యాసాన్ని ప్రచురించుకున్నారు. నా పేరు తీసేసి వ్యాసాన్ని ప్రచురించుకోవడం కాపీరైట్ చట్టం కింద నేరం అవుతుంది. కనీసం నన్ను సంప్రదించకుండా నా వ్యాసాన్ని పునర్ముద్రించుకున్నప్పుడు నాపేరు తొలగించడం సరైంది కాదు. ఈ విషయాన్ని ఆ బ్లాగులో కామెంట్ బాక్స్ లో రాస్లే, అప్రోవల్ తర్వాతనే దాన్ని ప్రచురిస్తారనే సాంకేతిక విషయం తెలిసిన వారు, ఈ తప్పెలా  చేశారు? 

ఆ మధ్య ఏకంగా నా వ్యాసాన్ని యథాతధంగా ప్రస్థానం పత్రికలో శీర్షిక కూడా మార్చకుండా వ్యాసకర్త పేరు మార్చుకొని ప్రచురించుకున్నాడు. ఈ విషయాన్ని సంపాదకులకు తెలిపితే, మరలా సంచికలో ఆ విషయాన్ని ప్రచురించి, వ్యాసకర్తను హెచ్చరించి, అతని నుండి వివరణ తీసుకున్నామని, ఇలా జరిగినందుకు విచారిస్తున్నామని, నాకు ఈమెయిల్ పెట్టి, అదే విషయాన్ని ఆ పత్రికలో ప్రముఖంగా ప్రచురించారు. 

నా వ్యాసం గురించి  ఆ బ్లాగులో ఇలా రాశాను. సమాధానం ఏమి వస్తుందో చూసి,తగిన చర్యలు తీసుకుంటాను. 

‘‘ఈ బ్లాగు మాదిగ జాతి గొప్పతనం గురించి మాదిగల గురించి వచ్చిన సాహిత్యాన్ని, చరిత్రను, సంబంధిత విషయాల్ని ఒక చోటకు చేర్చుతున్న తీరు బాగుంది. కానీ మీరు ఎవరి వ్యాసమైనా తీసుకున్నప్పుడు వారి పేరుని ఆ వ్యాసం దగ్గర రాయాలి. అది మీరు ఎక్కడ నుండి తీసుకున్నారో కూడా రాయాలి. అలా కానప్పుడు అది భావచౌర్యం కిందికివస్తుంది. కాపీరైట్ చట్టం ప్రకారం అది నేరం కూడా అవుతుంది. ఉదాహరణకు నేను మాదిగల పై రాసిన పరిశోధన వ్యాసాన్ని యథాతధంగా August 03, 2018 తేదీన మీ బ్లాగులో https://welcometonagsblog.blogspot.com/2018/08/blog-post_15.html ప్రచురించుకున్నారు. కనీసం నా పేరు ఎక్కడా రాయలేదు. ఇది యూనివర్సిటి గ్రాంట్స్ కమీషన్ వారి ఆధ్వర్యంలో చేసిన మేజర్ రీసెర్చ్ ప్రాజెక్టులో భాగంగా రాసిన వ్యాసం. దీన్ని మీరు ఇలా చేయడం సరైనది కాదు. నా అనుమతి తీసుకొని మీరు పునర్ముద్రిస్తున్నానని ముద్రించుకోవచ్చు. కానీ మీరు అలాచేయలేదు. వెంటనే మీరు నన్ను సంప్రదించి, పాటించవలసిన నియమాలను పాటించవలసినదిగా కోరుతున్నాను. 

మీ

ఆచార్య దార్ల వెంకటేశ్వరరావు, తెలుగుశాఖ, సెంట్రల్ యూనివర్సిటి, హైదరాబాద్ ఈమెయిల్ darlahcu@gmail.com / ఫోను: 9182685231 ’’