అవసరానికో అంబేద్కర్

నువ్వు అవసరానికో నినాదమై
వాళ్ళగొంతుల్లో వినపడుతుంటావు
నువ్వు అవసరానికో ప్రదర్శన బొమ్మవై
వాళ్ళ చేతుల్లో కనపడుతుంటావు
నువ్వు అవసరానికో బలమైన వాదమై
వాళ్ళ అవసరాన్ని నిలబెడుతుంటావు
నా కంటే
మా కంటే
వాళ్ళే నిన్ను
బాగా అర్థం చేసుకున్నారన్నంతగా
మమ్మల్ని భ్రమపెడుతుంటారు
గొంతుదాటని మాటల్ని
గోడదాటినవెంటనే ఊసేస్తుంటే
నా గొంతు బొంగురుపోతోంది
అవసరం తీరగానే ఆవలపడేసి
వాళ్ళెవరినో దేవుళ్ళను జేసి
మొక్కుతున్న ఆ చేతులు చూస్తుంటే
నా కరములసహనపడుతుంటాయి
వాళ్ళకవసరం తీరగానే
ఆవలపారేసినా
నువ్వు మా జీవితమౌతావు
నువ్వు నా గుండె గుడిలో దేవుడివవుతావు!
-ఆచార్య దార్ల వెంకటేశ్వరరావు, 8-2-2020