వింటావులే నిశ్శబ్ద విస్పోటనం!

డియర్ సద్దాం!

నీకు తెలుసా వాడిప్పుడు
మృత్యువై వెంటాడుతున్న మృత్యువు వాడు
భయం నటించటం కూడా ఇష్టపడని
జెడ్ కేటగిరీలో నిర్భయ జీవితమతడు
ప్రజాస్వామ్యాన్నీ,సార్వభౌమాధికారాల్నీ,
జీర్ణం చేసుకున్నఅగ్ర రాజ్యాధిపత్యమతడు
వాడిప్పుడే కాదు ఎప్పుడూరాజరికంతోనే స్నేహిస్తూ
ప్రజాస్వామ్యానికి తేనెపూస్తాడు
వాడిప్పుడేకాదుఎప్పుడూ చెప్పిన మాటకు
చేసే మాటకు పొంతనకలవనివ్వడు
వాడెప్పుడూవిత్తనమయ్యో, వృక్షమయ్యో
పేటెంటయ్యో, మనమేథో తీరమ్మీద స్వారీచేస్తుంటాడు
వాడి గురించిఒక్క మాటలో చెప్పేదేముంది
విశ్వనాశన రూపమతడు!
ప్రేమతో కౌగలించుకున్నాప్రతీకారంతో చెలరేగిపోయినా
యుద్ధానంతర ప్రశాంతమతడు.
మననీటినీ, కన్నీటినీ తాగుతాడు
మనగాలినీ,మన ఊపిరినీ శ్వాసిస్తాడు

కాలుకింద భూమి కదులుతోంది
కనికరం పనిచేయదు
మౌనం బద్దలవ్వాల్సిందే
బొందిలో ప్రాణం బొందలో పెట్టకుండా మేల్కోవాల్సిందే

ఇప్పుడు వాడి కలల గుడారాన్నికూల్చాస్సిందే!

మై డియర్ సద్దాం!
అందరూ చావాల్సిందే
చావుకి నిర్భీతితో నిర్వచనమిచ్చావ్
నీలోనూ లోపాలున్నా
యుద్ధం చేయాల్సినవాడితో తలపడ్డందుకేనేమో
నీతో నే నా కరచాలనం!
ప్రపంచాన్ని శ్వాసిస్తున్న
శాసనాన్ని దిక్కరించినందుకే నీకు చేస్తున్నా ఓ సలాం!
నిజానికి ఓడిపోయిందెవరో మాకు తెలుసు
నిజానికి ప్రపంచ ప్రజల గురికి వేలాడిందెవరో మాకు తెలుసు!
కట్టేసి కాల్చేసి
ఎన్ కౌంటర్లంటున్నవాటినెన్నింటిని చూడట్లేదు
ఓటేసేవరకూ హోరెత్తే వాగ్ధానాల్నెన్ని వినట్లేదు
నీ చావు మాకెక్కడ ఆశ్చర్యం కలిగిస్తుంది చెప్పు!
నిన్ను చంపాననుకుంటున్నాడు
వాడు నిత్యం చస్తూనే ఉన్నాడు!
నీ శిలా విగ్రహాలు కూల్చేసినా
మా హృదయాల్లో శాశ్వత చిత్రాల్నెవరూ చెరిపేయలేరులే!
వలువల్ని విలువల్లేకుండా వలిచే
మాటల్నేర్చిన మీడియానీ నమ్మే స్థితిలో లేమిప్పుడు!
పంటకాలం కోసం కొడవళ్ళతోనే సిద్దంగా చూస్తున్న వాళ్ళామే అంతా!

ఇప్పుడొక నిశ్శబ్దంలో ఉన్నా మౌనం మోసపోదు
ఇప్పుడొక నీలితెరని బలవంతంగా కప్పేసుకున్నా
మౌనం ఓడిపోదు
మౌనమిప్పుడు పిడికిళ్ళు బిగించుకుంటోంది
నిశ్శబ్దం విస్పోటించినప్పుడు నువ్వెక్కడున్నావింటావులే!
- డా.దార్ల వెంకటేశ్వరరావు

vrdarla@gmail.com