ఇక్కడ పుట్టడమే నేరమా?

పుట్టుక గురించెవరైనా మాట్లాడుతుంటే

నా వెన్నులో వణుకు పుట్టుకొస్తుంది

విశ్వం పుట్టడానికెన్ని సిద్దాంతాలున్నాయో ...

నాకు తెలియదు కానీ...

ఈ ప్రపంచంలో నేను పుట్టడానికిమాత్రమొక్కటే సిద్ధాంతం

వంశపారంపర్యంగా నాకుటుంబంవాళ్ళే

దేవుడిపెళ్ళాలైపోవడం

భూస్వామ్యానికి భోగవస్తువునై

పెత్తందారీ చిత్తాన్ని రాగరంజితం చేయడం

వాళ్ళ కామదహనానికి బలైపోతూ

తరతరాలుగా మాతంగిగానలిగిపోవడం

అంతా తమపుట్టుక గురించి

ఏవేవో పురాణాల్ని పవిత్రంగా వినిపిస్తుంటే

నేను కూడా

ఏ పోలేరమ్మనో, ఏ పోచమ్మనో రచ్చబండ మీద కీడ్చుకొచ్చి

నేనెవడికి పుట్టానో

నాకెవడివల్ల ఎవడు పుట్టాడో

ఆదేవతలచేతే చెప్పించాలనిపిస్తుంది

అయినా నాకో అనుమానంగానీ...

మహాపురుషుల పాదాలనుంచి పుట్టినోళ్ళు తప్ప

ఆదేవుళ్ళెవ్వరికీ ఇతరుల యవ్వనాలంతగా రుచించవా...?

- డా. దార్ల వెంకటేశ్వర రావు.

( ఈ కవిత ఈ రోజు (29-01-2007) ఆంధ్ర ప్రభ దినపత్రిక 'సాహితీ గవాక్షం ' లో ప్రచురితమయ్యింది)